De Luc Frieden huet d'Talent, dem Land Märercher fir boer Mënz ze verkafen. Am RTL-Interview behaapt hien, d’US-Stroftaxen hätte "kee groussen Impakt" op d'Lëtzebuerger Wirtschaft. Da kënne mer jo lo alleguer berouegt sinn. Ma souguer an der CSV selwer suergt dem Premier seng Ausso fir Kappzerbrieches. Säi Parteikolleeg Laurent Mosar nennt d'Taxepolitik vum Trump eng "Katastroph fir de Welthandel".

D'Weltwirtschaft ziddert, ma Lëtzebuerg ass laut dem neie Luc net betraff. Kloer: de Grand-Duché ass eng Insel, wou ëmmer d'Sonn schéngt, déi awer ëmginn ass vu stiermesche Mäert. Ma jiddereen, deen de Luc Frieden kennt, weess: Dee Mann ass beileiwe keen naive Spund. Wann et een am Land gëtt, deen d'Risike vun der internationaler Taxepolitik kennt, da wuel hien, gell?

Ëmmerhi war hie President vun der Chambre de Commerce, déi elo Alarm schléit an, opgrond vun den US-Taxen, vun engem "historesche Broch" schwätzt. Donieft war hien och President vun Eurochambres, der Daachorganisatioun vun den Europäeschen Handelskummeren.

Ausserdeem war hie President vum Verwaltungsrot vun der BIL a Vice-Chairman vun der Deutsche Bank zu London – also do, wou global Mäert net nëmmen observéiert, mee carrément entstinn. Anscheinend war seng Zäit zu London éischter e Stage a Schönfärberei.

De Stolgigant ArcelorMittal, mat Sëtz zu Lëtzebuerg a mat sengen 3.600 Mataarbechter, ass ee vun de gréissten op der Welt, an ass direkt vun den Trump-Stroftaxe betraff. Eng Tax vu 25% um Stol ass keng Bagatelle, mee e wirtschaftleche Schlag an d'Gesiicht. E Véierel vun de Lëtzebuerger Metall-Exporter geet an d'USA! De Grupp beschwéiert sech schonn iwwert e Réckgang vun der Demande. Ma am Luc Frieden senger Welt schéngt ArcelorMittal aus dem Gediechtnes geläscht ze sinn. Vläicht exportéiert d'Firma symbolesche Stol – fir déi emotional Stabilitéit vun der Natioun.

D’lëtzebuergesch Sous-Traitanten vun der Autosbranche – ongeféier 700 Firme mat iwwer 8.000 Lounofhängegen – hänken um Baxter vun der europäescher Automobilindustrie. Wa beispillsweis däitsch Constructeure wéi BMW oder VW wéinst den US-Taxe manner exportéieren, betrëfft dat och déi lëtzebuergesch Fournisseuren. Am Secteur gëtt schonn iwwer Kuerzaarbecht nogeduecht. Ma fir de Luc Frieden schéngt dat kee Problem ze sinn. Vläicht well hie mengt, datt Sensoren, Kabelkludderen a Pneuen sech selwer heemlech an d'USA exportéieren.

Bal 20% vun de Verméigen, déi zu Lëtzebuerg verwalt ginn, stamen aus den USA. Wa Washington op d'Iddi komme sollt, sech och d'Finanzservicer op d'Long ze zéien, an zum Beispill eng Transaktiounssteier fir Finanzdéngschtleeschtunge freet oder den Investisseure virschreift, si missten hir Suen an den USA uleeën, da kënnt d'Lëtzebuerger Fongenindustrie seriö an d'Schweessen. Ma de Luc Frieden, fir deen d’Finanzplaz bis elo eng helleg Kou war an deen den Triple-A mat alle Mëttele verteidegt huet, schéngt sech net méi u seng Wierder vu virun e puer Méint ze erënneren.

Besonnesch pikant: Dem neie Luc säin CSV-Parteikolleeg Laurent Mosar bezeechent dem Trump seng Taxepolitik als "Katastroph fir de Welthandel". Ma de neie Luc berouegt weider, a behaapt, d'Lëtzebuerger Ekonomie wär net betraff. Eng Rëtsch Leit froen sech: Haten s’op der Sorbonne en anere Wirtschaftscours wéi op der Harvard University? Oder lieft de Luc Frieden an enger Parallel-Welt, wou d'Chambre de Commerce just gutt ass fir Receptioune mat Schnittercher ze organiséieren?

Insider munkelen, dem neie Luc géif et drëm goe, seng Parteikolleegin Ursula von der Leyen ze decken, déi de 15%-Deal am Juli 2025 am Hauruckverfaren mam Donald Trump op engem schottesche Golfterrain ausgehandelt huet.

Anerer spekuléieren, de Frieden géif alles maachen, datt den US-President nëmme net rose mat him gëtt - dat wär nämlech en diplomatescht Inferno, dat schonn sou munchem Staatschef de Stull kascht huet. Well jiddereen, deen sech géint d'Interesse vum Trump stellt, riskéiert net nëmme schlecht Handelsbezéiungen, mee muss souguer mat engem Regime Change rechne, ganz am Stil vun der neier Weltuerdnung.

An iwwerdeems de Mario Draghi virun e puer Deeg op en Neits gewarnt huet, Europa géif seng global Muecht verléiere wann et net a seng eege Wirtschaft investéieren géif, riet de neie Luc sech léiwer an: "D'US-Stroftaxen hu keen Impakt op Lëtzebuerg." Eng Ausso, déi ongeféier sou glafwierdeg kléngt wéi: "D'Titanic geet nimools ënner". Genau dat hunn och déi geduecht, déi bis zum Schluss um Deck gedanzt hunn.

De Luc Frieden schéngt ze verdrängen, datt Lëtzebuerg vun den internationale Liwwerketten ofhängeg ass, an datt ee net einfach de Kapp anzéien a waarde ka bis de Stuerm eriwwer ass. Et sief dann, hie gleeft drun, datt Ignoranz eng Schutzmauer ass.

Soulaang de Lëtzebuerger Premier sech selwer ariet, eis Ekonomie wär vun den US-Stroftaxen net betraff, bleift se onberéiert. Op d'mannst soulaang bis den nächste Container vun ArcelorMittal vun Déifferdeng zu Baltimore am Hafen ukënnt.

Lo fehlt nach just, datt de Luc Frieden eis erklärt: "Dem Donald Trump seng Stroftaxen sinn eigentlech ee Seegen fir eis Ekonomie."

Link fir den Original-Artikel mam Premier Luc Frieden seng Ausso "Lëtzebuerger Wirtschaft wäert kee groussen Impakt duerch US-Douanestaxe spieren": https://www.rtl.lu/news/national/a/2331704.html

Och interessant: