De Finanzminister Gilles Roth (CSV) huet am Summerinterview mam Télécran e Saz gesot, deen esou glat ass wéi säin Déngschtwon: "Aarmut ass fir mech inakzeptabel." Bravo, Gilles. D’Welt huet op dëse Moment gewaart. D’Armutsbekämpfung ass geléist – mat engem Saz.

Ma iergendwéi kann een de Finanzminister gutt verstoen. Mat enger Ministeschpai vun 18.000 € de Mount – indexéiert, versteet sech – plus 3.200 € Representatiounsbonus – steierfräi – Déngschtwon a Persouneschutz, ass et kloer: Aarmut ass fir hien net nëmmen “inakzeptabel“ - se ass guer net fir hie virgesinn. Dofir läit d'Betounung am Gilles Roth sengem Saz jo och op "fir mech": "Aarmut ass fir mech inakzeptabel". Mat engem monatleche Package, dee vill Leit net emol an engem Joer zesummekréien, ass Aarmut fir de Minister esou realistesch wéi eng WG vu Revis-Empfänger um Belair.

125.000 Leit liewen zu Lëtzebuerg op oder ënnert der Aarmutsgrenz. Dat ass 1 vu 5 – an dat am räichste Land vun der Welt. Domat platzéiert sech Lëtzebuerg op Plaz 1 an der Groussregioun. Dës Leit kréie kee Chauffeur a kee Bonuns, mee héchstens ee Rendez-vous am Aarmebüro.

De neie Luc huet a senger Ried zur Lag vun der Natioun d’Logementskris fir eriwwer erkläert. Ma och d’Aarmut wier am Gaang, sech a Loft opzeléisen, huet hien dem Land erkläert. D’Caritas hat gewarnt, an ass kuerz drop implodéiert. D’Regierung huet séier en Ersatz aus dem “HUT” gezaubert, a mat Leit besat, déi dem Staat aus der Hand friessen.

"Aarmut ass inakzeptabel" kléngt wéi aus engem CSV-Walprogramm. Mee soulaang d’Politik net bereet ass, de Problem bei der Wuerzel ze paken – Steierpolitik, Wunnengsmaart, Kanneraarmut – bleift et bei engem Saz.

E schéine Saz.

E Saz, dee gutt kléngt, mee näischt ännert.

E Saz mat Déngschtwon, Parkplaz, an null Konsequenz.