NATO-Sommet: 5% fir d'Oprüstung

"Lëtzebuerg wëll Entscheedungen iwwer d'Verdeedegungsausgaben am Aklang mat den aneren 31 NATO-Memberstaaten treffen", sot de Luc Frieden op der Pressekonferenz nom Ministerrot vum 13. Juni 2025. Scho virum Sommet waren d'NATO-Memberstaaten sech eens, de Bäitrag op 5 Prozent vum PIB (Bruttoinlandsprodukt) ze erhéijen.

Wéinst der grousser Zuel vu Grenzgänger huet de fréiere Krichsminister, de Bausche Fränz, eng Extrawurscht fir Lëtzebuerg ausgehandelt: De Bäitrag vu Lëtzebuerg gëtt net um PIB, mä um BNI (Bruttoinlandsakommes) berechent, wat liicht méi niddreg ass.

Well de neie Luc op kee Fall wollt, datt den US-President Trump rose mat him gëtt, huet hien déi geplangte 780 Milliounen Euro, déi am Budget stoungen, op 1,2 Milliarden Euro eropgesat - fir déi berühmt 2% z'erreechen. Eng einfach Regel de tri weist: Wann ee 5% wëllt an d'NATO abezuelen, da muss een 3 Milliarden Euro opdreiwen. Am Verglach: Dat ass véiermol méi wéi déi 750.000€ vu virdrun, oder ganzer 10,5% vum lëtzebuergesche Staatsbudget! Wat kéint ee mat deem Geld net alles maachen? Schoulen renovéieren. Sozialwunnengen bauen, d'Aarmut bekämpfen oder d'Gesondheetsversuergung ausbauen.

D'5%-Regel gëllt natierlech net fir d'USA. Si bleiwe gemittlech bei hiren 3% vum PIB. Ironie? Kaum. Et ass éischter dat bekanntent Spill: Fuerderunge stellen, awer sech selwer net drun halen. "America first" – ëmmer virbäi, ausser wann et ëm d'Bezuele geet.

De Nato-Generalsekretär Mark Rutte huet et esou formuléiert: "Wann dir déi 5% net erreecht, kënnt Dir Är Pensiouns- a Gesondheetssystemer bäibehalen - awer dann léiert besser Russesch." Asou, dann ass jo alles kloer. No der Logik vum Rutte muss een tëscht Pensiounssécherheet a Patriot-Prestige wielen – béides ass wahrscheinlech ze luxuriéis.

D'Bevëlkerung spiert et schonn elo: D'Pensiounsreform ass amgaang finaliséiert ze ginn; d'Salariéen wäerten an Zukunft méi laang musse schaffe goen fir um Endeffekt manner erauskréien. D'Cotisatiounsjore ginn no an no verlängert, an d'Mindestpensioun gëtt net erhéicht. Gläichzäiteg gëtt de private Pensiounssystem (drëtte Pilier) gestäerkt - also: spuer wann s de kanns, soss has de Pech. Gläichzäiteg sollen eis Rentereserven awer geholl ginn fir an d'Rüstung ze stiechen. Kléngt no engem fairen Deal. Virausgesat, et verkeeft een en op enger Waffefoire mat gratis Schnittercher.

Am Juni 2025 gouf bekannt, datt de lëtzebuergesche "Fonds de Compensation" (FDC), dee fir d'Pensiounsreserven zoustänneg ass, decidéiert huet, nees a Rüstungsfirmen wéi Rheinmetall ze investéieren – natierlech "no enger grëndlecher ethescher Iwwerpréiwung", wéi betount gouf. Rheinmetall war virdru op der "rouder Lëscht", gouf awer nees erofgeholl, nodeems d'Firma anscheinend opgehalen huet, ëmweltschiedlech Phosphorwaffen ze produzéieren. "Mir hunn d'Garantie kritt, datt de Fonds keng allgemeng Oprëschtungspolitik verfollegt", sot d'Djuna Bernard (déi Gréng) iwwer d'Re-investitioun a Rheinmetall. Dat ass berouegend.

Lëtzebuerg soll "net méi domm solle si wéi déi aner an och kucken, dass mer e Retour kréien", sot den Ausseminister Xavier Bettel (DP) géintiwwer RTL de 16. Juni um "Salon international de l'aéronautique et de l'espace" um Paräisser Fluchhafen Le Bourget. Mee anscheinend ass mam Investissement a Rakéiten awer kee Profit ze maachen, wéi eis dat versprach.

Well trotz dem NATO-Sommet an den Oprëschtungsfantasies vun vun eise Spëtzepolitiker, sinn d'Aktie vun der Rheinmetall zënter Juni 2025 am fräie Fall. No engem Rekordhéich vun iwwer 1.900 Euro ass de Cours vun den Aktien op 1.670 Euro gefall, mat engem weideren prognostikéierte Réckgang op 1.500 Euro. D'Grënn: Asäckle vum Gewënner, geopolitesch Onsécherheeten an d'Erkenntnis, datt souguer Panzeren keng nohalteg Profiter garantéieren.

Mee Pensiounsfongen, déi a Rüstungsaktien investéieren, déi permanent u Wäert verléieren, weisen zumindest Courage a Risikobereetschaft. Genau déi Dugenden, déi a Krichszäiten gebraucht ginn. Also, wou ass de Problem?

„Dëse Plang ass eng Investitioun an eis Défense an an eis Sécherheet“, sot d'Arméiministesch Yuriko Backes der Press den 12. Juni 2024. Wierklech? E Panzer, deen irgendwann verrascht, ass also eng Investitioun? Ökonomesch gesinn handelt et sech Konsumausgaben – keng Plus value, kee Profit, just e Budgetslach, dat sech fëllt … mat Feier an Damp.

Fir e bessert Verständnis – ganz einfach erkläert:

🟩 Investitioun: Et keeft een en Haus. Et bleift stoen an de Wäert klëmmt. Et kann een dran wunnen oder et verlounen. Et huet een e Gewënn.

🟩 Konsumausgaben: Et schéisst een e Freedefeier an d'Luucht – et ass schéin, awer no zéng Minutten ass just Damp do, d'Sue si fort.

🟩 Militärausgaben: De Staat keeft eng Rakéit, vun där en hofft, datt en se ni benotze muss. Wann dach, ass dono alles fort: d'Suen, d'Rakéit – an iergendeen aneren. Ass se bis gezünt, kritt ee näischt zréck.

Laut de Stratege vun der NATO an den europäesche Spëtzepolitiker stinn "d'Russen" schonn virun der Dier a wäerten Europa bis spéitstens 2028 oder 2029 attackéieren. Et géifen Hiweiser, Absichten an Zeechen aus der Kristallkugel – mir mussen elo oprëschten.

Awer: Firwat dann bis 2035 waarden? Huet de Putin éiren ugeruff? "Hallo NATO? Hei ass de Putin. Kee Stress, ech gräifen iech eréischt 2035 un, wann dir opgerëscht sidd. Loost Iech also roueg Zäit mat de Panzeren. Dat wier jo soss net fair, gell?"

Oder huet de Kreml en Doodle un d'NATO-Membere geschéckt, wou  se sech fir de passenden Ugrëffsdatum umellen kënnen? Et kéint sinn, datt dënschdes kee gudden Dag ass, well Rumänien nach keng Munitioun huet. Donneschdeg klappt et, awer nëmme, wa Lëtzebuerg d'Ersatzdeeler fir säin A400M Transportfliger geliwwert kritt huet.

Jiddereen, deen un d'Mäerchen gleeft, datt d'Russen spéidstens 2028/2029 ugräifen, datt mer awer bis 2035 Zäit hunn, fir eis drop virzebereeden, gleeft warscheinlech och, datt de Putin mat sengem angeeblechen Ugrëff waart, bis all Waffekontrakter korrekt ausgeschriwwen, op méiglech Auswierkungen op d'Ëmwelt iwwerpréift a schlussendlech geneemegt goufen.

Wat feelt lo nach? Richteg: den Héichpunkt vum ganzen Zodi. Um Enn vum Sommet decidéiert d'NATO eestëmmeg a mat kräftegem Applaus, dem Donald Trump de Friddensnobelpräis ze verginn. Net well hie nominéiert gouf, mee: "D'NATO huet decidéiert. Punkt."

Mir vu Luxembourg Jungle sinn der Meenung: hien huet e verdéngt. Well schonn den 20. Januar 2025 huet den Donal Trump a senger Untrëttsried am Capitol gesot: "Mäi Vermächtnis, op dat ech am am houferegsten sinn, wäert dat vun engem Friddensstëfter a Versöner sinn. Dat ass wat ech wëll sinn, e Friddensstëfter a Versöhner."