Wärend déi eng nach an der Vakanz an déi aner scho mat de Gedanke bei der Schueberfouer sinn, ass den Innenminister Léon Gloden (CSV) ewell voll am Asaz a raumt op. Keen Dreck oder illegal getippe Bauschutt – nee, Mënschen. Strummerten. D’Land feiert, de Minister raumt Mënschen.

Nodeems de Léon Gloden d'Strummerte vir d'éischt aus eidelen Haiser erausgeheit an dunn aus dem Stadzentrum verjot huet, geet hien hinne lo no bis an de Grengewald, wou e puer vun hinne sech gewot haten, Zelter hannert dem RTL-Gebai opzeriichten. E bësse Schiet, e bëssen Dignitéit. A virun allem, am Bësch stéieren se jo keen. Ma de Gloden ass kategoresch: "Strummerten hu weder eppes an der Stad nach am Gréngewald verluer!"

No Récksprooch mat senger Frëndin Lydie, huet hien eenzock zwou Police-Patrouillen erausgeschéckt, mat der klorer Missioun: Grouss Botz. D'Strummerten am Bësch haten keng Waffen, keng Drogen, keng Lobby – just Schlofsäck. Mee dat geet duer fir zu Lëtzebuerg als Sécherheetsrisiko ugesinn ze ginn. D'Police koum, a kuerz drop waren d'Zelter mat de Leit dra verschwonnen.

D'Police géif de Besëtzer vum Gréngewald kontaktéieren fir hien iwwer d'Präsenz vun den Obdachlosen z'informéieren, konnt een an der Press liesen. De Besëtzer? Also de Staat. Den Inneminister Léon Gloden. An anere Wierder: De Gloden rifft de Gloden un, fir de Gloden ze froen, wat de Gloden gedenkt  mat de Strummerten am Gréngewald ze maachen. De Gloden seet: "Du hues alles richteg gemaach!", an hänkt an.

Strummerten an Heescherten sinn dem Léon Gloden zënter jeehier en Dar am A. Dofir hat hie schonn am Januar, bei der repressiver Phas vum Heescheverbuet, d'Police mat Schéiferhënn géint se agesat. D'Biller an der Press hunn deemols fir hefteg Kritik an der Bevëlkerung gesuergt. Ma de Léon Gloden léisst sech net béien. "Law and Order" ass dem Chrëschtdemokrat säi Mantra, "Humanitéit" an "Nächsteléift" just lästeg Begrëffer aus vergaangenen Zäiten.

Iwwerhaapt ass dem Léon Gloden säi Bléck op Washington geriicht, oder besser gesot op säi Virbild, den Daddy Trump. Well wéi den Trump den 11. August matgedeelt huet, datt hie Washington D.C. géif vun den Obdachlosen befreien, huet et keng Woch gedauert, bis de Léon Gloden "nogetrumpelt" ass.

Wat kënnt als nächst? Wann den Trump Strummerten wäit ewech vu Washington deportéiere wēllt, denkt de Léon Gloden dann éiren drun fir s'iwwer d'Grenz ze setzen? Vläicht e Shuttle-Service a Richtung Belsch oder Frankräich, mam Gloden als Chauffeur? Oder en neit Gesetz: Jiddereen, deen net verméigend genuch ass, muss op d'mannst 100 Kilometer vun der Stad ewech bleiwen.

Dem Léon Gloden säi Virgänger, de Luc Frieden, ass 2004 selwer am Garer Quartier mat op Police-Patrouille gaangen. Haut ass de neie Luc Premierminister. An de Gloden? Hie raumt weider op.

Béis Zonge behaapten, de Léon Gloden wär am Gespréich fir den nächste Premierminister ze ginn.

Och interessant: