Et ginn diplomatesch Kaddoen, déi engem Freed maachen: eng Vas, e Buch, eppes aus Keramik, eng Skulptur. An da ginn et déi, déi ee kritt, einfach well een um falsche Sommet war. Sou wéi de Luc Frieden, dee vum NATO-Sommet zu Ankara mat engem gravéierte Revolver zréckkoum, luxuriéis verpaakt, zesumme mat sechs Kugelen.

Den Essentiel huet direkt d'Fro gestallt: "Wat mécht de Luc Frieden mam Revolver, deen hie vum Recep Erdogan geschenkt kritt huet?“ Eng Fro, déi sech normalerweis just an engem Krimi stellt, mee elo och an der Lëtzebuerger Politik.

Mir hunn e puer Virschléi fir de Premier.

De Revolver kéint als Instrument fir den Zäitmanagement déngen: eng klenge Gest bei den Halfter, e Bléck op d'Auer, fir duerno ze soen:
"Ech géif elo gär virukommen."

D'Deputéierte géifen op eemol feststellen, datt Rieden och manner wéi eng hallef Stonn dauere kënnen.

Wärend de Budgetsdiskussioune kéint e Schoss an d'Loft (natierlech ouni Kugel) den Enthusiasmus vun der Oppositioun bremsen, wann se nees mat hire "kreative" Fuerderunge kënnt.

De Luc Frieden kéint engem anere Staatschef de Revolver bei der nächster Auslandsrees weiderverschenken.

Oder e kéint e behalen an en als Ofschreckungseffekt géint d'Europäesch Kommissioun asetzen: "Wann Dir nach eng Kéier behaapt, Lëtzebuerg wär e Steierparadäis, da paken ech dem Erdogan säi Kaddo aus!"

Et ass jo bekannt: Lëtzebuerg ass esou kriminell ginn, datt een sech bal net méi ouni Waff aus dem Haus traut. Dat seet op d'mannst d'Social-Media-Fraktioun vu Sécherheetsexperten, déi ëmmer weider wiisst, an déi hiren Diplom bei de Facebook-Kommentare gemaach hunn.

De Premier kéint also mat guddem Gewësse soen: "Ech hunn eng Waff, mee se ass neutraliséiert, se schéisst net méi." Genee wéi eis Debatten: ëmmer wäit vum Schoss.

Am Mudam kéint de Revolver ausgestallt ginn ënner dem Titel: "Diplomatesche Kaddo – Frieden schaffen, ohne Waffen."

D’Kuratorin géif erklären: "Dëst Wierk weist, datt Fridden net mat Waffen erreecht ka ginn, mee duerch d’Decisioun, se net ze benotzen. Oder se ze neutraliséieren. Oder se hanner Glas ze stellen.“

De Staatsministère kéint decidéieren, d’Waff "irreversibel ze neutraliséieren".

Dat heescht: Se funktionéiert net méi, mee se bleift symbolesch geféierlech. Dat ass quasi d’Definitioun vun europäescher Politik.

De Revolver kéint hanner Glas ausgestallt ginn, mat engem klengen Hummer niewendrun – genee wéi beim Feieralarm. A mat engem Schëld: "Nëmmen am Noutfall aschloen: EU-Infraktiounsprozedur, Koalitiounskris oder schlecht Press."

De Premier huet elo eng Waff, déi net schéisst, mee alles ausléist:

Diskussiounen, Symboler a Satir.

Dat ass dach eigentlech déi schéinste Form vu Politik:

Eng Waff, déi näischt mécht, ausser Geschichten.

An dat ass méi wéi déi meescht Kaddoe fäerdeg bréngen.