Zanter Wochen geeschtert op de soziale Medien eng archaesch Zeitungssäit duerch d’Timeline: d’BILD-Zeitung vum 5. August 1975, mat enger jonker Fra am Waasser an der Schlagzeil: "37 Grad – Es bleibt so heiß!“

An drënner, wéi ëmmer wann d’Argumenter ausginn: "Der Klimawandel war noch nicht erfunden und Greta war noch nicht geboren."

Dat ass ongeféier esou wëssenschaftlech wéi wann een engem Astronom erkläert: "Ech gleewen net un d’Galaxien, well ech gesi keng vu mengem Balkon aus."

D’Logik ass herrlech: "Et war 1975 och scho waarm, also kann et haut kee Klimawandel ginn."

No deem Prinzip kéinte mer direkt nach e puer aner historesch Erkenntnisser reaktivéieren:

✅ D'Dokteren hunn an de 70er an der Praxis gefëmmt.  

Also war Tubak gesond, an d'Longen hunn dat gär. Haut sinn d'Warnungen op de Päck just eng Verschwörung vun der Anti-Tubak-Lobby.

✅ D'Kanner sinn ouni Sécherheetsgurt am Auto ronderëmgeflunn.  

Also war d’Gravitatioun deemools manner aggressiv. Haut ass se just hypersensibel ginn.

✅ Asbest war e Wonnerstoff.  

Haut gëtt en a Vollschutzcombinaisonen ewechgeholl, mee deemools war en esou harmlos, datt een e quasi als Vitamin hätt kënne verkafen.

Wann d’BILD-Zeitung vun 1975 d'Wëssenschaft vun haut definéiert, da war d'Mënschheet deemools op hirem intellektuellen Héichpunkt. Alles duerno war just eng Iwwerreaktioun.

D’Argument: "D'Greta war nach net gebuer."

Jo. Den Newton och net, wéi him den Apel op den Kapp gefall ass, an trotzdeem ass d'Gravitatioun net eréischt 1687 erfonnt ginn.

No där Logik gëtt et d'Klimaforschung eréischt zanter 2003. Déi 200 Joer Wëssenschaft virdrun – de Joseph Fourier mat senge Recherchen iwwert den Treibhauseffekt 1824, den Charles David Keeling mat sengen CO₂-Miessunge vun 1958 – waren da wuel just d'Generalprouf fir den Aktivismus vun enger schweedescher Schülerin. 

Bakterien  hunn och net gewosst, datt se existéieren, bis de Leeuwenhoek se 1676 duerch säi Mikroskop gesinn huet. Virdru war alles steril.

An d'CO₂-Molekül huet sech och net geduecht: "Oh, ech sinn erfonnt ginn, elo wier ech gär klimarelevant."

Naturgesetzer brauche keen Acte de naissance.

Mee et ass schéin, datt d'Klimaskeptiker endlech eng Form vu Spiritualitéit fannen.

Jo, CO₂ war ëmmer an der Loft.

Waasser ass och ëmmer am Mier, an trotzdeem gëtt et keen, deen e Glass voll Nordsee-Mierwaasser drénkt.

D'Quantitéit ass de Punkt.

1975: 330 ppm  

Haut: 420 ppm

't ass wéi beim Béier:

Ee Patt ass gutt. 10 Pätt provozéieren Diskussiounen.

D’BILD-Zeitung huet 37°C geschriwwen.

D’Wiederstatioun zu Bremen huet 35,2°C gemooss.

D'BILD huet also net d'Wieder gemooss, mee d'Temperatur um wäermste Parking vun der Stad, wou d'Loft esou gliddeg war wéi an engem Auto mat zouene Fënsteren.

Déi 37°C waren eng Hëtztinsel, net de Landesduerchschnëtt.

Mee 50 Joer méi spéit gëtt dat als "Beweis" géint de Klimawandel benotzt.

Dat ass wéi wann een eng Foto vum Stau op der Diddelénger Autobunn hëlt an behaapt: "D'Land ass iwwerbevölkert."

1951 hat Däitschland 3 Hëtztdeeg pro Joer.

D'lescht Joer: 12.

Dëst Joer bei eis zu Lëtzebuerg: schonn 9 – an et ass eréischt Juni.

Dat kann een net mat engem Screenshot vun enger Zeitungssäit vun 1975 plattmaachen.

Dat ass eng Kurve, déi méi staark klëmmt wéi d'Stëmmung um Stammdësch nom drëtten Humpen.

Wann eng Zeitungssäit vu 1975 d’Wëssenschaft ersetze soll, da soll een och konsequent sinn:

▻ Dokter mat der Zigarett am Bak

▻ Kanner ouni Gurt am Auto

▻ Asbest als Vitamin

▻  Ozonlach als modeschen Acessoire, well d'Stratosphär 1975 nach kee Grond hat, sech ze beschwéieren

Oder et akzeptéiert een, datt mer an de leschte 50 Joer eppes bäigeléiert hunn – iwwer Longen, Sécherheet, an och iwwer d'Klima.

Eng Schlagzeil ass kee Klimamodell.

Eng jonk Fra am Waasser ass kee Beweis.

An den Ënnerscheed tëscht Wieder a Klima ass nach ëmmer net bei jidderengem ukomm.

d'Schwëmmerin vun 1975